21 февраль ЮНЕСКО тарафынан Халыҡ-ара туған тел көнө тип иғлан ителде.
Тел – кешелек йәмғиәтенең иң ҙур ҡаҙанышы. Донъяла кеше бер үҙе генә йәшәй алмай, ул башҡа кешеләр менән аралашыуға мохтаж. Һөҙөмтәлә, аралашыуға, бер-берең менән фекер алышыуға булған ихтыяждан тел барлыҡҡа килә.
Тел шул уҡ ваҡытта ижтимағи күренеш. Ул кешелек йәмғиәте тыуыу менән бергә барлыҡҡа килгән һәм кешелек йәмғиәте үҫеше менән бергә үҙгәрә, байый һәм үҫә.
Хәҙерге көндә тел ғилеме фәне иң үҫешкән фәндәрҙең береһе һанала. Әммә ер йөҙөндәге телдәрең һаны теүәл иҫәпләнмәгән. Француз ғалимдары кешелек донъяһы 5651 телдә һөйләшә тигән нәтижәгә килә. 500гә яҡын тел генә яҡшы өйрәнелгән, 1400ҙән артығы рәсми танылыу тапмаған.
Ошо байрам айҡанлы районыбыҙҙа төрлө уҡыу йорттарында, мәктәптәрҙә Туған телдәр көнө билдәләп үтелде. Беҙҙең лицейыбыҙ уҡыусылары ла был саранан ситтә ҡалманы. Әйтергә кәрәк, лицейҙа туған тел булараҡ рус, башҡорт, татар телдәре уҡытыла. Уҡыусылар был дәрестәрҙе берҙәй яҡын итеп, ашҡынып көтөп алалар.
Иртән мәктәпкә килеп инеү менән уҡыусыларҙы, уҡытыусыларҙы байрам атмосфераһы ҡолас йәйеп ҡаршы алды. Мәктәп радиоһынан милли музыка, һәр тәнәфес һайын рус, башҡорт, татар телдәрендә яңғыраған тел тураһында мәғлүмәттәр, шиғырҙар бөтәһенең күңеленә хуш килгәндер, мөғайын.
Туған телдәр көнө лицейҙағы атмосфера менән генә сикләнеп ҡалманы. Башҡорт, татар, рус телдәренән бирелгән асыҡ дәрестәр һәр уҡыусыла туған телгә булған һөйөүҙе, уға ихтирам хистәрен тағы ла арттырҙы.
Ғөмүмән, туған тел әсә һөтө менән ҡаныбыҙға һеңгән. Әсә теле донъяны танытҡан, кешеләр менән аралаштырған, белем биргән ғәзиз тел.
Ул башҡа телдәрҙе белергә юл асҡан. Ике йәки бер нисә белеү нур өҫтөнә нур була. Сит телдәрҙе алты йылда өйрәнеп була, әммә үҙ телеңде ғүмер буйына өйрәнергә кәрәк, тип әйткән мәшһүр философ Вольтер. Былар үҙ сиратында мәҙәни нормалар тыуҙыра, ошо нигеҙҙә туған тел көнөндә барлыҡ телдәр ҙә тигеҙ дәрәжә лә таныла, сөнки һәр тел кеше һаҡларға тейешле тере мираҫ булып һанала.
Туған телебеҙгә ҡарата иғтибарлы, ихтирамлы булып, уны һәр ваҡыт иҫтә тотоп, һөйләшеп, уның сафлығы, матурлығы өсөн көс һалайыҡ, дуҫтар!
